Nógv virksemi í Flatnahaga

Tað gongur rætta vegin við at seta upp nýggju vindmylnulundina í Flatnahaga, millum Havnardal og Oyggjarvegin. Veðrið hevur tó verið óstøðugt. Mjørkin darvaði  eitt sindur í seinastu viku, men tað gongur sum ætlað.

Finn Jacobsen, stjóri í Magn, sigur, at SEV, sum er undirveitari í hesi verkætlan, er komið væl áleiðis við at leggja káplar og at gera háspenningsarbeiðið.  

Oyggjarvegurin varð avgrivin, soleiðis at háspenningskáplar kundu leggjast tvørtur um til koblingsstøðina á Húsareyni. Hetta er gjørt í tøttum samstarvi við SEV,  sum samstundis leggur nýggjar káplar til Sandoyartunnilin, nú Oyggjarvegurin skuldi gravast av.

Sum tað sær út, so verða tað góð veðurlíkindi fram til mikudagin, so tá skuldi tann fjórða myllan verið komin væl áleiðis.

Myndir: Sverri Egholm