Fjórði lekin funnin á Nord Stream leiðingini

Svenska sjóverjan hevur nú boðað frá, at tað eru tilsamans fýra lekar á teimum báðum Nord Stream gassleiðingunum í Eystrasalti.

Tann fjórði lekin hevur verið kendur síðan týsdagin, sigur svenska sjóverjan, sambært Aftonbladet.

Fjórði lekin skal liggja millum teir báðar lekarnar á Nord Stream 1, men talan er um ein leka á nýggjara Nord Stream 2 leiðingini.

Danska sjóverjan hevur ikki send nýggj boð út í sambandi við fjórða lekan, skrivar dr.dk í morgun.

Aftonbladet skrivar, at granskarar á universitetinum í Lund søgdu týsdagin, at teir høvdu staðfest tvær spreingingar í økinum, har gassleiðingarnar ganga.

Tann fyrra hendi mánanáttina klokkan 02.03 lokala tíð í ein landsynning úr Bornholm, og sum elvdi til skaðan á Nord Stream 2. Hesin var máldur til 1,8 á richterskalanum.

Hin var klokkan 19.04 mánakvøldið nærhendis teir báðar lekarnar á Nord Stream 1 leiðingini á hædd við svenska býin Simrishamn. Henda spreingingin var fimm ferðir sterkari, máldi 2,3.

Men nú verður sagt, at talan møguliga kann vera um tvær spreingingar við stuttum millumbili.