Krafta tangabilar komnir til landið við Norrønu

Tveir stórir tangabilar komu við Norrønu í vikuni til nýggja orkufelagið Krafta.

Nú verða  seinastu stigini í bygging av nýggjari tangagoymslu til gassolju á Hulki á Strondum tikin. Komandi vikurnar verður tað serliga uppseting av tekniskari útgerð og inn- og royndarkoyringar av skipanum. 

Ætlandi er goymslan klár til rakstur eftir hálvan juni, og so skulu endalig sýn gerast og góðkenningar latast frá myndugleikunum sigur Kári Sigvardsen, rakstrarstjóri hjá Krafta Energy.

Gassoljugoymslan á Hulki fevnir um  2 tangar á 2500 m3 hvør, lessirampa til tangabilar og bunkersstøð til skip á bryggjuni. Krafta kann soleiðis bæði veita við tangavognum kring landið og eisini beinleiðis við bryggjuna á Strondum. 

Fyritøkan fer at hava nýggjar stórar tangavognar, sum kunnu taka 44.000 litrar við hvørja ferð, og eru teir serliga bygdir til skipabunkringar.