Helge Lund frá sum nevndarformaður í BP

Fyrrverandi stjórin í táverandi norska oljufelagnum Statoil, Helge Lund, fer nú frá sum nevndarformaður í einum av heimsins størstu orkufeløgum, bretska BP. Hetta sigur felagið frá í morgun. Hann verður sitandi til 2026, tá felagið skal hava funnið ein nýggjan nevndarformann, sum kann standa á odda fyri nýggju strategiini hjá felagnum, sum m.a. er aftur at raðfesta olju og gassvirksemið, sum er tað, ið gevur felagnum bestu fíggjarligu úrslitini. 

Tað hevur leingi verið gitt, at Helge Lund ikki fór at gerast gamal sum nevndarformaður, nú fleiri av partaeigarunum ikki hava verið nøgdir við hansara arbeiði.

Stórar rembingar hava verið í BP í mong ár í sambandi við framtíðar strategiina hjá felagnum. Nøkur ár herfyri varð avgjørt at leggja  størri dent á grøna orkuskiftið og minni á olju- og gasspartin. Tað vísti seg nevnilig aat gera fíggjarligu støðuna hjá felagnum munandi verri, og tí tóku partaeigarar stig til at venda aftur til olju og gass tvs. at dúva meira uppá at gera íløgur í olju og gass.

Hetta er ein gongd, sum nú í eina tíð hevur merkt fleiri at teimum stóru orkufeløgunum bæði í USA og kring heimin. Feløg, sum hava valt frá raðfestingina av íløgum í grøna orku, eru m.a. ExxonMobil, Chevron, Shell, Equinor og TotalEnergies.

Ein høvuðsorsøkin til at Helge Lund nú leggur frá sær, er tann, at hann hevur tikið undir við broytingunum til eitt meira grønt orkufelag, nakað, sum nógvir partaeigarar við íleggjaranum Elliot hava verið ímóti og herfyri hava fingið undirtøku fyri.

Helge Lund, sum hevur verið nevndarformaður í BP síðani 2019,  hevur eisini aðrar týðandi nevndarsessir, eitt nú sum nevndarformaður í Novo Nordisk. Hann er eisini nevndarlimur í føroyska felagnum Tjaldur.