Landsstýriskvinnan altíð sinnað at tosa við SEV

Tað visti ÚF at siga frá í tíðindunum týskvøld. Sambært almenna innlitinum ÚF hevur fingið, hevur aðalráðið, sum umsitur orku og harvið eisini SEV, einki skrásett skjal seinasta hálvárið um nakra tilsøgn í sambandi við pumpuskipanina hjá SEV. 

Tað var annars stýrisformaðurin í SEV, Kári Johansen, sum í tíðindasendingini hjá KVF mánakvøldið, gjørdi greitt, at pumpuskipanin var í vanda, fær SEV ikki tilsøgn um eina vindmyllulund á staðnum.

Stýrisformaðurin segði, at SEV má fáa eina tilsøgn frá landinum og Orka um, at vindparturin av verkætlanini eisini er klárur, tá pumpuskipanin verður tikin í brúk. 

-Vit vilja øll tað grøna og serliga SEV. Visiónin sigur eisini 2030. Vit heita tí á landsstýrið at geva okkum eina vissu og váttan fyri, at vindurin vit skulu brúka verður tøkur, tá skipanin verður tikin í nýtslu segði stýrisformaðurin. 

Sambært ÚF koma úttalilsini hjá stýrisformanninum óvart á landsstýriskvinnuna Ingilín Strøm og hava tey fingið hana til at rætta Sev eina hond. 

Tí eftir at hava hoyrt samrøðuna  við stýrisformannin í Sev í KVF hevur landsstýriskvinnan, sum varar av málsøkinum, skrivað til Sev og stýrisformannin. Har sigur hon seg altíð vera fús at hitta umboð fyri Sev um mál av týdningi.

Kelda: KVF og ÚF