Norra skerjir oljuframleiðsluna

Norska stórnin hevur gjørt av at fylgja øðrum oljuframleiðandi londum kring heim og skerja sína oljuframleiðslu.

Skerjingin kemur í gildi í juni, tá framleiðslan verður minkað við 250.000 tunnum um dagin og síðani við 134.000 tunnum um dagin í seinnu helvt av 2020. Samtíðis verður framleiðslan frá fleiri keldum í desember í ár lækkað við 300.000 tunnum um dagin.

Seinast oljuframleiðslan í Norra varð lækkað var í 2002.

Tað var í gjárkvøldið, at norski oljuráðharrin Tina Bru kunnaði um, at Norra nú fer at minka um oljuframleiðsluna. Tó verður gassframleiðslan ikki ávirkað.

Andstøðan í norska Stórtinginum tekur undir við avgerðini hjá stjórnini at minka um framleiðsluna, sum kemur eftir, at Opec+ herfyri gjørdu av at skerja teirra framleiðslu við nærum 10 mió. tunnum um dagin fyri at viga upp ímóti stóru minkingini í eftirspurninginum í kjalarvørrinum á koronakreppuni.

Frá 1. mai kemur avgerðin hjá Opec+ í gildi, og væntandi fer hetta eisini at ávirka oljuprísin.