Vindmylnulandið omanfyri Havnina framleiðir skjótt streym frá 25 myllum

Um somu tíð sum felagið Røkt ger allar sínar seks vindmyllur á Gellingarkletti endaliga klárar til at framleiða streym inn á netið hjá SEV, eru tey hjá Orkufelagnum av álvara farin í gongd at seta upp sínar seks vindmyllur í Flatnahaga. 

Nú um dagarnar kom fyrsta tornið upp, og í vikuni vórðu veingirnar koyrdar niðan í Flatnahaga. Har hevur Orkufelagið gjørt grundarlagið  klárt við vegum og fundamentum til myllurnar.  Nú hevur so veitarin av vindmyllunum Enercon tikið yvir og er farin undir stóra arbeiðið at seta upp vindmyllurnar og gera tær klárar til at framleiða streym.  Væntandi verður fyrsta myllan klár í september, og síðani koma allar hinar sohvørt. 

Stjórin í Magn, Finn Jakobsen segði við útvarpið í gjár, at teir vænta, at alt koyrir innan árslok. Tvs. at teir tá hava royndarkoyrt myllurnar og streymur kann fara inn á netið hjá SEV.

Talan er um seks myllur, sum hvør er 3 MW ella tilsamans 18 MW, sum skulu kunna framleiða tilsamans 64 GWT um árið.  Hetta fer at svara til 15% av framleiðsluni hjá SEV í fjør, sum var uppá 160 GWT. Finn Jakobsen sigur, at hetta er ein rímuliga stór øking í samlaðu grønu orkuni og fegnast hann um, at Magn og Tryggingarfelagið Lív, sum eiga Orkufelagið, kunnu vera partur av hesum  so týðandi grøna orkuskiftinum í Føroyum. 

Tað var 2. november í fjør, at Heðin Mortensen, borgarstjóri og Finn Jakobsen, stjóri í Magn settu spakan í jørðina  í Flatnahaga. Tá alt er liðugt um knapt eitt hálvt ár fer vindmylnulundin

at kunna framleiða tað, sum svarar til nýtsluna hjá 13.000 húsarhaldum. Magn eigur 40% av P/F Flatnahagi,  meðan Tryggingarfelagið Lív eigur 60%.