Battarískipan hjá SEV í trygga legu

Stórur var spenningurin, tá SEV nakað fyri jól tók spildurnýggja battarískipan í brúk á Sundi. Henda hevur verið í gerð í eina tíð. Beint undan jólum hendi so tað, at skipanin fór í svart. Men síðani er skipanin komin aftur í eina trygga legu. Tað skilst á menningarleiðaranum hjá SEV, Terja Nielsen, at brekini nú eru rættað og fara tey neyvan at endurtaka seg.

Hann segði við útvarpið í gjár, at tað vóru tvey óhapp fyri jól, sum gjørdu, at battarískippanin koblaði út. Eftir tað hava fólk frá SEV saman við veitarunum kannað og rættað brekini. 

-Talan var um innstillingar í battarískipanini sjálvari, sum vit ikki vóru varugir við, sigur Terji Nielsen.  

Hann vísir á, at nú koyrir battarískipanin sum hon skal, og skulu vit sjálvandi rokna við, at skipanin nú fer at koyra uttan trupulleikar. 

-Hon hevur koyrt siðani stutt eftir jól við góðum úrslitum, og tað er rættiliga umráðandi hjá okkum at hava hana koyrandi hesa árstíðina, tá vit hava nógvan  vind.

Battarískipanin stabilserar vindin og ger,  at vit betri fáa gagnnytt ta vindorkuna, sum tá er tøk,  og at vit fáa so nógva vindorku inn á netið sum gjørligt. Eisini figgjarliga hevur tað nógv at siga fáa meira vindorku inn á netið og harvið  minka um oljunýtsluna  á oljuriknu verkunum.