Grøna vindorkuskiftið: Plásstrot í evropeiskum havnum

Hetta vísir ein kanning, sum vindmylnuframleiðarin Vestas hevur gjørt, sambært blaðnum Ingeniøren. Greiningin, sum Vestas hevur gjørt, vísir, at einans 12 havnir í Evropa liva upp til at kunna tryggja veitingar og havnapláss til tær túsundtals risastóru vindmyllurnar, sum skulu setast upp í Evropa komandi árini og sum er í tráð við grøna orkuskiftið.

-Longu frá 2025 fara vit at síggja plásstrot í havnunum. Tær kunnu ikki fylgja við teimum politisku ætlanunum um øking av vindmylnuorkuni sigur Keld Kristensen frá Vestas.

Hetlendingar hava stórar ætlanir við havvindmyllum 

Eisini kring okkara leiðir, bæði í Hetland og í Skotlandi gera havnir seg út til at kunna taka ímóti eftirspurninginum, sum verður til tíggjutals stórar havvindmylnulundir. Hetta ger seg eisini galdandi í økinum vestan fyri Hetland, har vindmylnulundir ætlandi um ikki so mong ár skulu veita streym til verandi og komandi olju- og gasspallar í økinum umframt at kunna veita streym til framleiðslu av grønari orku og brennievnum av ymsum slag. 

Eisini í Føroyum er man so smátt farin at hyggja at  møguleikunum og avbjóðingunum, sum møguligar havvindmylnulundir um okkara leiðir kunnu reisa.