Uttanlands

Metnógvar oljuboringar í Norra

Alt bendir á, at tað fer at verða borað eftir olju og gassi í Norra sum sjáldan áður komandi árini

Umboð fyri borifeløg og oljufeløg fegnast um boriframtíðina á norska landgrunninum, sum er tryggjað komandi fimm árini

2023-01-12 22:37

Jan Müller

Stóri eftirspurningurin eftir olju og gassi fyri at tryggja orkutrygdini í Evropa hevur við sær, at borifeløgini fara at fáa ov mikið at gera.

Í vikuni skrivaðu stjórarnir í fleiri av tænastufeløgunum í oljuvinnuni, Halliburton, Noble Corporation og Odfjell Drilling undir sáttmálar um at standa saman um framtíðar boringar á norska landgrunninum. Feløgini fara undir samstarv við oljufelagið Aker BP, sum hevur sett út í kortið at fara undir fleiri útbyggingar komandi fimm árini.

Sáttmálarnir hava við sær, at fýra pallar frá Noble og Odfjell Drilling skulu bora umleið 150 brunnar á norska landgrunninum hesi komandi fimm árini, í samarbeiði við Halliburton.

Hetta kemur eftir, at norski oljurisin Aker BP í fjør lat myndugleikunum inn útbyggingarætlanir fyri tíggju olju- og gassleiðir á norska landgrunninum. Samlaðu íløgurnar eru mettar til meira enn 200 mia. kr.

Júst tað at bora brunnar hevur alstóran týdning fyri komandi verkætlaninar. Vanliga fevnir boring av brunnum um 30 til 50% av samlaðu útreiðslunum av komandi útbyggingum.

Samanleggingin av Noble Corporation og danska Mærsk Drilling hevur stóran týdning fyri avtaluna við Aker BP.

Avtalan verður mett at fáa stóran týdning fyri oljuvirksemið í norska partinum av Norsðjónum og fer Stavanger at vera miðdepilin fyri arbeiðinum.

Vinarliga broyt tínar kennifíla - og privatlívsstillingar fyri at síggja hetta innihald