Innanlands

Umhvørvisárinsmeting av sólorkuskipan í Miðvági

P/F Luna hevur lagt eina sólorkuskipan á tekjuna á landstøðini hjá felagnum í Miðvági.

2022-07-25 17:30 Author image
Jan Müller
placeholder

Sólorkuskipanin er uppbygd av 528 sólpanelum. Mønin á bygninginum vendir suður-norður og tí liggja sólpanelini á eystur- og vestursíðuni, 264 á hvørjari síðu. Samlaða ársframleiðslan verður uml. 120.000 kWt. skrivar Umhvørvisstovan. 

Sambært § 16 í elveitingarlógini skal umhvørvisárinsmeting gerast og góðkennast, áðrenn loyvi til framleiðslu av ravmagni verður givið.

Í árinsmetingini skal verða mett um, hvørjar møguligar fylgjur ætlaða virksemið kann hava fyri umhvørvið.

Av tí at sólpanelini eru løgd á tekjuna á einum verandi bygning eru tey ikki mett at hava stóra ávirkan á landslagið ella lívfrøðiliga margfeldi á staðnum. 

Tað verður ikki mett, at ampar verða av óljóði ella skuggakasti frá sólpanelunum. Ein simulering er gjørd fyri at kanna møguligar ampar av afturskini frá sólpanelunum. Afturskin stendist av, at sólarljós verður speglað av einum luti.

Umhvørvisárinsmetingin er almenn og kann síggjast her (niðast á síðuni).

Áðrenn árinsmetingin verður viðgjørd, skulu viðkomandi myndugleikar, stovnar, áhugafeløg og almenningur hoyrast. Her er almenna lýsingin

Freistin til hoyringarsvar er 24. august 2022 skrivar Umhøvvisstovan


 Um tú hevur spurningar ella viðmerkingar er tú vælkomin at ringja til Umhvørvisstovuna, telefon 342400, ella at senda  ein teldupost á [email protected]



Vinarliga broyt tínar kennifíla - og privatlívsstillingar fyri at síggja hetta innihald

placeholder