Bretska stjórnin vil skunda undir Cambo útbygging við føroyska markið

Í tráð við orkupolitikkin hjá nýggju bretsku stjórnin verður nú av álvara farið undir at seta ferð á fleiri stórar útbyggingar av olju- og gassleiðum og infrakervinum ymsa staðni á bretska landgrunninum. Hetta skrivar Energy Voice, sum veit at siga frá, at millum keldurnar, sum skulu byggjast út er Cambo hjá Ithaca Energy, Murlach hjá BP og Talbot hjá Harbour Energy. Aðrar keldur, sum standa á listanum, har ferð skal setast á útbyggingar, er Victory gasskeldan eystan fyri Føroyar. 

Bretska stjórnin ynskir at útbyggja orkukeldur í Norðsjónum, her bæði olju- og gass og varandi orku so sum vind. 

Umframt olju- og gassútbyggingar verða eisini tosað um havvindorku, vetni og fangan og goymslu av CO2 verkætlanir. Westminister hevur sett sær fyri at fara undir meginpartin av teimum verkætlanunum, sum eru klárar móti endanum av næsta ári, talan er um at “speed up development and construction”, sum tað stendur í almennu avgerðini.

-Komandi mánaðirnar fara vit at leggja fram lógaruppskot, sum kunnu skunda undir menningina og kunngera vit nú eina røð av verkætlanum, sum vit fara at raðfesta og seta ferð á bæði innan flutning, orku og samskifti.

Westminister hevur og fer at gera sítt til at økja um olju- og gassvirksemi í kjalarvørrinum á russisku innrásini í Ukraina. Tí verður ein nýggj útbjóðing til oljuleiting latin upp í oktober, sum skal økja um leiting eftir nýggjum olju- og gasskeldum, sigur ráðharrin.

Væntandi fer avgerðin hjá stjórnini at møta mótstøðu frá umhvørvisfelagsskapum, sum longu hava hótt við at fara í rættin við stjórnini, um hon gevur grønt ljós til útbyggingar so sum hana við Cambo, ið longu hevur verið ein kastibløka í orkukjakinum.

Umhvørvisfólk serstakliga frá víðgongdu felagsskapum so sum Extension Rebellion hava raðfest Cambokelduna í sínum mótmælum móti nýggjum olju- og gassvirksemi.

Umhvørvisfelagsskapir vísa á, at útbygging av olju- og gasskeldum stríðir ímóti veðurlagspolitikkinum hjá ST og altjóða samfelagnum. Eisini skotska stjórnin við SNP og teimum grønu hevur funnist at ætlanunum hjá bretsku stjórnini at loyva leiting og útbygging av olju- og gasskeldum í Norðsjónum, tó vitandi at endaliga avgerðin liggur  í London. 

Tað hevur tó avgerandi raðfesting hjá nýggju bretsku stjórnini at fáa gongd á orkuútbyggingar tað veri seg olju og gass eins og varandi orkukeldur so sum vind og sól.