Eykaaðalfundurin hjá SEV ikki endaliga avgreiddur

Regluligi eykaaðalfundurin hjá SEV varð hildin á Hotel Hilton í dag, og á skránni var sum vant nevndarfrágreiðing, roknskaparúrslit og fíggjarætlan fyri komandi ár.

Nevndin boðaði m.a. frá, at serliga avsláttar- og stuðulsskipanin fyri ídnaðarkundar, sum hevur verið í gildi síðan 1992, skal endurskoðast og broytast ella takast av. 

Sum part av fíggjarætlanini fyri komandi ár legði nevndin eisini fram uppskot um eina príshækking á 25 oyru fyri allar kundar. Príshækkingin er neyðug orsakað av øktum rentustøði, kostnaðarstøði, herundir serliga útreiðslum til olju, umframt íløgur, sum liggja fyri framman, sigur SEV.

Men full semja var ikki um uppskotið um hækkingina á 25 oyru fyri øll, og aðrir møguleikar vórðu umrøddir á fundinum. Í tíðindaskrivi boðar SEV frá, at avgjørt varð at útseta støðutakan til fíggjarætlanina fyri 2023 til eykaaðalfund í desember.