Gera klárt til elframleiðslu í Flatnahaga

Um góðan hálvan annan mánað verður klárt at seta fulla ferð á elframleiðsluna frá teimum seks vindmyllunum hjá Magn og Lív í Flatnahaga.

Støðan í Flatnahaga er góð, nú alt arbeiðið er liðugt hjá bæði eigarunum og   veitarunum EL.FO og J&K Petersen, SEV og Enercon sigur Finn Jacobsen, stjóri í Magn.   

Nú byrja royndarkoyringarnar. Fyrst skulu sonevndar  funktións-testir gerast av øllum lutum í hvørjari myllu sær og teldusamskifti til kontrollrúmið hjá SEV. Síðan verður ein og ein mylla sett inn á netið. Um 14 dagar verða so tríggar myllur royndarkoyrdar á netinum eftir einum avtalaðum leisti.

Tá tað er nøktandi verður farið víðari at royndarkoyra hinar 3 myllunar. Finn Jacobsen sigur, at  um alt gongur eftir ætlan yvirtaka teir myllurnar 16. desember í ár, og tá kann SEV brúka myllurnar við fullari framleiðslu.

Til várs fer J&K Petersen at gera lendisarbeiðið heilt liðugt.

Tá tær seks vindmyllurnar í Flatnahaga fara undir framleiðslu verða ikki færri enn 25  vindmyllur í trimum vindmylnulundum í vindorkulandinum omanfyri Havnina.