Hava minkað um útlátið við 17 prosentum fyrsta árið

9. september, eitt ár eftir at framsøkna ætlanin um at minka útlátið við 17% varð kunngjørd, kunnu limafeløgini í Burðardygt Vinnulív boða frá, at tey í felag hava minkað CO2 útlátið við 17 prosentum. Allir limirnir minkaðu antin um Vav 1 ella 2-útlátið og onkur bæði, og onkur við tilsamans 23 prosentum. Teirra partur av føroyska útlátinum minkaði frá 11 prosentum í 2020 til 9 prosent í 2021. 

Hendan minkingin gjørdist veruleiki minni enn eitt ár eftir, at feløgini bundu seg til verkætlanina. Átøkini fevna millum annað um at gera maskinpartin elektroniskan, skifta til burðardyggar køli- og hitaskipanir og at skifta yvir til elbilar.

Stovnandi limirnir í verkætlanini, Bakkafrost, Betri Banki, Effo, Faroe Ship, Føroya Tele, Gist og Vist, JT electric, KJ Hydraulik, MBM, P/F Poul Michelsen, SMJ og Vónin, hava eisini kunngjørt 50 tiltøk fyri at minka um teirra ávirkan á náttúruna, millum annað við at økja um innsavningina og endurnýtsluna av nótum frá fiskivinnuni og alivinnuni, minka um nøgdina av burturkasti og at nýta burðardyggar rávørur. 

Átøkini, sum feløgini bundu seg til, vórðu kunngjørd á einum tiltaki, har leiðslurnar í feløgunum eisini løgdu fram eina leiðbeining fyri, hvussu føroyskar fyritøkur kunnu rapportera teirra ESG-lyklatøl (umhvørvis-, sosial- og leiðsluviðurskifti). 

Nevndarformaðurin fyri átakinum og stjórin fyri Gist og Vist, Johannes Jensen, sigur í viðmerking.

- Tað er sera gevandi at síggja so góð úrslit eftir at hava samstarva í einans eitt ár. Átakið hevur givið okkum ein møguleika at samstarva og motivera hvønn annan og eisini at fáa íblástur frá øðrum feløgum uttanfyri Føroyar. Endamál okkara er at vísa ábyrgdafulla leiðslu, so vit fara at gera meira við at loysa avbjóðingar í vinnulívinum og fara at menna felags amboð. Eitt økt gjøgnumskygni í okkara arbeiði innan burðardygd og at eggja øðrum at gera tað sama er grundarsteinurin í sterku brúnni, vit skulu byggja.