Oljugrunnurin í Norra setir met við 17.000 mia. kr.

Tað gongur skjótt at fylla ein hin máttmiklasta peningagrunnin í heiminum, norska Oljugrunnin. Peningurin frá olju- og gassvirksemi á norska landgrunninum eins og frá partabrævamarknaðinum  streymar inn og setir eitt nýtt met fyri og annað eftir. Nú er metið einki minni enn 17.000 mia. norskar kr. Hetta váttar leiðslan í grunninum fyri norska miðlinum E24. 

Orsøkin til vøksturin stavar fyrst og fremst frá avkastinum frá partabrøvum og frá rentum men eisini frá pengum, sum koma frá stjórnini. Grunnurin hevur m.a. nógvan pening á amerikanska partafelagsmarknaðinum. 

Fleiri vegamót vóru í grunsins søgu í farna ári. Við ársbyrjan í fjør varð virðið á grunninum 12.429 mia. kr., sum vaks til 13.000 mia. kr. í januar, til  14.000 mia.  í februar, 15.000 mia.  í mai og til  16.000 mia. kr. í desember. 

Virðið á grunninum hevur stóran týdning fyri, hvussu nógv  norska stjórnin kann brúka av pengum í dagligu nýtsluni. Stjórnin kann brúka upp til 3% av grunsins virði á fíggjarlógini á hvørjum ári. Við einum virði uppá 17.000 mia. kr. kann stjórnin brúka 510 mia. kr.

Við undantaki av árunum 2002 og 2018 er virðið á grunninum økt á hvørjum ári síðani byrjanina í 90-unum. Leiðslan í grunninum hevur tó fleiri ferðir ávarað um, at virðið á grunninum kann eisini minka munandi í eini kreppustøðu. Sjálvur metir grunnurin í eini sonevndari stresstestkanning, at virðið á grunninum í ringasta føri kann minka niður í 5000 mia. kr. yvir tey komandi 3 til 5 árini.