Innanlands

Suðuroy 84 prosent grøn í oktober

Í Suðuroy skaraði oktober mánaði framúr við grønari orku, og ongantíð áður hevur ein mánaði hilnast so væl við grønari orku sigur SEV frá á heimasíðu síni

2022-11-04 13:32 Author image
Jan Müller
placeholder

Orsøkin er partvís sera góð vind- og vatnviðurskifti og partvís nýggja battarískipanin og synkronkompensatorin í Porkeri, sum kom í rakstur í summar.

Heili 84% av orkuframleiðsluni stavaðu frá grønum orkukeldum, meðan motorarnir á Vágsverkinum stóðu fyri 16%, sum er tað lægsta nakrantíð. Vindmyllurnar í Porkeri stóðu fyri  góðum 60%, og vatnorkuverkið í Botni stóð fyri góðum 23% av elorkuni.

Vágsverkið hevur ongantíð áður framleitt so fáar kilowatttímar úr olju, sum farna oktober. 0,47 GWt bleiv tað til, sum í tonsum svarar til góð 95 tons. Í tilsamans 22 dagar hevur Vágsverkið ligið stilt, meðan framleiðslan hevur verið 100% grøn.

[object Object]

Samlaða framleiðslan í Suðuroy í oktober kom upp á 2,9 GWt, og skuldi Vágsverkið framleitt alla orkuna úr olju, hevði oljunýtslan uml. 600 tons. Sparingin er sostatt yvir 500 tons - bert í oktober. 

Áðrenn vindmyllurnar og tann stabiliserandi tøknin komu í Suðuroy, var býtið millum termiska- og varandi orku umleið 10-15% varandi orka og 85-90% olja. Vert er eisini at nevna, at tann møguliga vindframleiðslan var áleið tann sama í juli sum í oktober. Við battaríum og synkronkompensatorinum fekst 3 ferðir so nógv vindorka til høldar í oktober í mun til juli, sigur SEV frá í spennandi og góðu tíðindunum, sum koma fram júst sum Tórshavnar kommuna skipar fyri grønari orkuráðstevnu í Norðurlandahúsinum, og har m.a. SEV er ein av luttakarunum.  

Vinarliga broyt tínar kennifíla - og privatlívsstillingar fyri at síggja hetta innihald

placeholder