USA lopið á iransku oynna Kharg

USA hevur í nátt okkara tíð lopið á iransku oynna Kharg.

Sambært amerikanska forsetanum, Donald Trump hevur USA oyðilagt øll hernaðarmál á oynni.

– Eg havi valt ikki at oyðileggja oljuundirstøðukervið á oynni. Men fara Iran ella nakar annar at gera nakað, sum órógvar fríu og tryggu skipaferðsluna gjøgnum Hormuzsundið, fari eg alt fyri eitt at endurskoða ta avgerðina, skrivar amerikanski forsetin á sín egna sosiala miðil, Truth Social.

Oyggin, sum hevur eina stødd á umleið 20 ferkilometrar, er umleið 25 kilometrar frá iranska meginlandinum.

90 prosent av oljuni, sum verður útflutt úr Iran, verður sambært The Guardian útflutt umvegis Kharg.