Útlátið av vakstrarhúsgassi minkaði í 2024

Hetta skrivar Umhvørvisstovan á síni heimasíðu.

Tá hugt verður at yvirskipaðu gongdini, sæst, at útlátið av vakstrarhúsgassi var rættiliga støðugt millum  2001 og 2016. Síðan vaks útlátið á hvørjum ári millum 2016  og 2021. Árið eftir, í 2022, minkaði samlaða útlátið fyri fyrstu ferð í meira enn tíggju ár. Sum myndin niðanfyri vísir, er henda støðan  galdandi uttan mun til,  um útlendsk fiskiskip verða tald við ella ikki.  

Í 2023 øktist útlátið aftur  frá 1,10 mió. tons í 2022 til 1,13 mió. tons CO₂-eindir. Í 2024 lækkaði útlátið tó aftur niður í 1,06 mió. tons CO₂-eindir, sum svarar til eina minking á 6 prosent. Verða útlendsk fiskiskip ikki tald við, svarar minkingin til á leið 7 prosent.

Mynd: Samlað útlát av vakstrarhúsgassi, við og uttan útlendsk fiskiskip, 2001-2024, í tons av CO₂eindum. 

Verður hugt nærri at orsøkunum til, at samlaða útlátið í 2024 var knapt 68 túsund tons CO₂-eindir minni enn í 2023, skyldast hetta serliga:  

• at føroysk fiskiskip bunkraðu 8 % minni av olju 

• at ídnaðurin brúkti 15 % minni av olju 

• at SEV brúkti 9 % minni av olju. Elframleiðslan var í størri mun grundað á varandi orku, eisini hóast elframleiðslan øktist við 5 %  

• at húsarhaldini brúktu 9 % minni av olju 

Yvirhøvur minkaði oljunýtslan, og harvið eisini útlátið av vakstrarhúsgassi, hjá øllum brúkarum. 

Myndin niðanfyri vísir gongdina í ymiskum útlátsbólkum, sum brenna olju (og burturkast), árini 1990-2024. Sum nevnt fall oljunýtslan og harvið útlátið hjá øllum brúkarum av olju. 

Mynd: Gongdin í útláti av vakstrarhúsgassi hjá brúkarabólkum, sum brenna olju, tíðarskeiðið 1990-2024. Útlendsk fiskiskip eru íroknað. 

Tølini stava frá frágreiðingini Útlát av vakstrarhúsgassi í Føroyum, 1990-2024, sum Umhvørvisstovan júst hevur almannakunngjørt.

Til ber at síggja alla frágreiðingina og  fleiri hagtøl um útlát av vakstrarhúsgassi í Føroyum í Vitanargrunninum hjá Umhvørvisstovuni á leinkjunum niðanfyri.