ES: Olja úr Russlandi bannast við ársenda

Tað er líkt til, at ES fer at banna innflyting av russiskari olju við ársenda, siga tvey embætisfólk hjá ES, eftir at ES-kommisjónin og limalondini hava umrøtt málið um vikuskiftið.

ES fyrireikar í løtuni tann sætta sonevnda revsingarpakkan við revsitiltøkum móti Russlandi, sum gjørdi innrás í Ukraina fyri góðum tveimum mánaðum síðani.

Hesi nýggju revsitiltøkini væntast at verða rættað móti russiskari olju, russiskum og hvítarussiskum peningastovnum, og fleiri einstaklingum og fyritøkum.

Sambært Reuters fara orkumálaráðharrar í ES at hittast til fund mánadagin at umrøða ætlaðu tiltøkini.