Innanlands

Illfýsin men metgrønur januar

Vindur og regn stóðu fyri meginpartinum av streyminum í januar - 62 prosentum - meðan olja stóð fyri 38 prosentum. Grøna elframleiðslan royndist væl í váta og ruskuta veðrinum og fyri fyrstu ferð fór samlaða framleiðslan úr varandi orku upp um 24 GWt ein einstakan mánað

Eftirspurningurin eftir elorku er framvegis sera høgur, og tilsamans nærkaðist nýtslan 39 GWt, sum er 4,4 prosent hægri enn í januar 2021

Eftirspurningurin eftir elorku er framvegis sera høgur, og tilsamans nærkaðist nýtslan 39 GWt, sum er 4,4 prosent hægri enn í januar 2021

2022-02-10 19:19 Author image
Agnar Prestá
placeholder

Vindur og regn stóðu fyri meginpartinum av streyminum í januar, t.e. 62 prosentum, meðan olja stóð fyri 38 prosentum.

Meðan grøna elframleiðslan í januar 2021 var undir miðal orsakað av stillum frostveðri, er støðan heilt ein onnur í januar 2022. Grøna elframleiðslan royndist sera væl í váta og ruskuta veðrinum, og fyri fyrstu ferð fór samlaða framleiðslan úr varandi orku upp um 24 GWt ein einstakan mánað. Framleiðslan var yvir 80 prosent grøn í tilsamans 19,23 tímar.

Vatnorkan kom upp á 17,7 GWt, meðan vindur og biogass rukku ávikavist 5,7 og 0,9 GWt. Væl meira enn helvtin av vatnorkuframleiðsluni varð framleidd á Eiðisverkinum, sum kom upp á 10 GWt. Eiðisverkið stóð fyri einum fjórðingi av allari framleiðsluni í januar. Avfallsnøgdin í januar í ár var 340 mm, meðan hon bert náddi 179,5 mm í januar í fjør, máld á Fitjunum í Vestmanna.

Býtið av orkukeldum í prosentum var ávikavist vatn 45, olja smá 38, vindur 15 og biogass góð 2 prosent. Eftirspurningurin eftir elorku er framvegis sera høgur, og tilsamans nærkaðist nýtslan 39 GWt, sum er 4,4 prosent hægri enn í januar 2021. Hetta er triði mánaðin á rað, at elnýtslan liggur um 39 GWt.

Vindorkan í meginøkinum royndist eisini væl við eini framgongd á 35 prosent í mun til januar 2021. Miðal vindferðin í Húsahaga var 14,8 m/sek í januar 2022, í mun til 7,8 m/sek somu tíð í fjør. Miðal vindferðin í Neshaga var 15,2 m/sek í ár, í mun til 8,3 m/sek í januar í fjør.


Suðuroy

Í Suðuroy royndist framleiðslan úr bæði vindi og vatni væl: vatnorkan var 100% betri, og vindorkan 63% betri enn sama mánað í 2021. Tilsvarandi var termiska framleiðslan á Vágsverkinum 27% minni enn í 2021. Býtið í Suðuroy var 57% termisk orka og 43% varandi orka.

Sólorkuskipanin í Sumba royndist ikki eins væl í januar í ár og í fjør. Hetta kemst av, at lutfalsliga nógvir klárir dagar vóru í stilla kavaveðrinum í fjør. Skipanin framleiddi 1,24 MWt í januar í ár, í mun til 1,90 MWt í fjør.

Tilsamans 3,3 GWt vórðu framleiddir í Suðuroy í januar.


SEV

Vinarliga broyt tínar kennifíla - og privatlívsstillingar fyri at síggja hetta innihald

placeholder