Pumpuskipan aftur á breddan  

Stóra og kostnaðarmikla verkætlanin hjá SEV at fara undir eina pumpuskipan í sambandi við grøna orkuskiftið er nú aftur frammi og fingu kommunurnar í Føroyum í vikuni kunning um pumpuverkætlanina, sum nú aftur er vorðin aktuell.

- Talan var um ein kunnandi fund, meðan endaliga avgerðin, har kommunurnar skulu taka støðu til, um nevndin í SEV skal sleppa at brúka 10 milliónir krónur  at kanna verkætlanina av nýggjum, verður á eykaaðalfundi fríggjadagin, segði  Haraldur Hammer, nevndarformaður í SEV við Dag og Viku í vikuni.

Higartil hevur SEV brúkt 60 milliónir kr. at kanna málið. Nú ynskir nevndin í SEV at fáa heimild frá limunum at brúka 10 mió. kr. aftrat til at kanna verktætlanina.

Upprunaliga var verkætlanin mett til at kosta 1,3 mia. kr., men tá tilboð komu inn, var prísurin hækkaður til 2,2 mia. kr. Hetta fekk táverandi formannin í SEV til at stegða við ætlanini.

Endamálið við at gera eina pumpuskipan er at kunna goyma vindorku til tess at kunna pumpa vatn frá einum verki í Vestmanna uppí eitt annað.

Tá eingin vindur er, letur man vatnið renna úr ovara vatninum á Mýriverkinum gjøgnum turbinuna, so tað framleiðir streym, áðrenn tað fer í aftur niðara vatnið, og kann pumpast upp aftur, tá vindurin kemur aftur. Og soleiðis skal tað koyra aftur og fram og framleiða grønan streym.

Tað var í  2022, at kommunurnar á aðalfundi góvu nevndini í SEV heimild til at byggja eina pumpuskipan í Vestmanna. 

Útbyggja Sundsverkið

Herfyri segði stjórin í SEV, Hákun Djurhuus við orkan.fo, at stóri og vaksandi eftirspurningurin eftir elorku hevur fingið leiðsluna í SEV at fara undir at kanna møguleikan fyri at fremja útbyggingar á Sundsverkinum. Hetta málið varð eisini kunnað um á SEV fundinum í vikuni. 

Hákun Djurhuus, stjóri í Sev segði annars  við orkan.fo, at veitingartrygdin stendur altíð ovast á breddanum í einari elveiting og so er eisini í Føroyum og at  kanningar eru farnar í gongd, sum leggja upp fyri vaksandi eftirspurninginum og neyðugari útskifting av framleiðslueindum.

- Nógvir møguleikar verða lýstir, og tað er ov tíðliga at siga nakað ítøkiligt, hvørjar loysnir og plaseringar verða valdar sigur Hákun Djurhuus.

Við Útvarpið á middegi í dag segði Kári Johansen, fyrrv. nevndarformaður í SEV, at tað er skeivt hjá SEV at fara undir at brúka stórar upphæddir til eina pumpuskipan, nú tá tað eisini er ætlanin at útbyggja verkið á Sundi. Hann ivaðist eisini í, um SEV fór at fáa fígging til slíkar verkætlanir. 

Grøna orkuskiftið og óvissa

Nú grøna orkuskiftið krevur av SEV,  myndugleikum og øðrum at gera íløgur í varandi orkukeldur so sum vind, hevur ætlaða pumpuskipanin alstóran týdning. Men samtíðis er tað eins týdningarmikið at byggja út orkuskipanina við bæði vindmyllum og sólpanelum. Eisini her er tørvur á at gera stórar íløgur. Haraftrat hevur tað oftani víst seg at vera torført at fáa neyðugu loyvini til at seta upp eitt nú vindmyllur. Mong halda hetta tekur ov langa tíð og at forðingarnar eru ov nógvar. Onnur siga, at øll atlit skulu takast til náttúru og umhvørvi. 

Um somu tíð stríðist eitt nú SEV við verandi vindmyllum. Fleiri teirra mugu skiftast út ella umvælast vegna føroyska verðurlagið. Ásannað verður eisini, at okkum tørvar vindmyllur á landi av sama slag sum tær, ið verða brúktar til havs. 

Samanumtikið kann sigast, at enn er langt á mál við grøna orkuskiftinum í Føroyum.  Fríggjadagin fáa vit so at vita, um gongd kemur á aftur pumpuskipanina hjá SEV og møguliga um, hvørjar ætlanir eru um útbygging av Sundverkinum.  

https://www.sev.fo/um-okkum/midlar-og-samskifti/webcasts/soleidis-virkar-ein-pumpuskipan