Uttanlands

Russland skrúvar fyri gassi til Letland

Russiska Gazprom boðaði í gjár frá, at tað hevur steðgað veitingini av gassi til Letland

2022-07-31 13:09

Jan Müller

Felagið sigur, at Letland hevur ikki hildið avtaluna um at taka ímóti gassi men ger ikki greitt, hvat tað merkir.

Higartil hevur Russland steðgað gassveitingini til fleiri lond í Evropa, Danmark, Finland, Póland, Bulgaria og Háland. Hetta er gjørt, tí londini ikki vilja gjalda í ruplum.

Russland hevur eisini steðgað veitingini til Shell Energy í Týsklandi.

Ein umboðsmaður fyri stjórnina í Letlandi, sigur sambært Ritzau, at tað fær ikki stóra ávirkan, at landið ikki fær gass úr Russlandi longur. Tí landið hevur longu avgjørt, at tað skal vera russiskt gass fyriuttan frá j. januar 2023.

Vesturheimurin skuldsetur Russland fyri at brúka gassveitingina sum amboð í einum búskaparligu kríggi móti sanktiónunum, sum serliga ES hava sett í verk móti Russlandi.

Russland er heimsins størsti framleiðari av gassi. Í mars segði Putin, at øll lond, sum eru óvinarlig móti russisku innrásini í Uraina, skulu í framtíðini rinda í ruplum fyri gassið, um tey framhaldandi vilja keypa russiskt gass.

Týsdagin samdust ES lond um at avmarka nýtsluna av gassi, nú veturin nærkast. Hóast ES nevndin hevur strongt á at fáa londini at binda seg til eina skerjing uppá 15% komandi mánaðirnar, so hevur ikki verið gjørligt at fáa eina semju, tó at londini eru samd um sjálvboðin at skerja gassnýtsluna.

Seinasta stóra tiltakið frá russiska síðu var tá landið herfyri skrúvaði fyri gassveitingi til Týskland gjøgnum Nord Stream 1 leiðingina. Hon letur nú bara 20% av tí gassi, sum annars fer gjøgnum leiðingina, tá hon koyrir við mestu ferð.

Letland, sum nú má vera russiskt gass fyriuttan, var partur av Sovjetsamveldinum til 1991 og er í dag limur í bæði ES og Nato.

Vinarliga broyt tínar kennifíla - og privatlívsstillingar fyri at síggja hetta innihald