Útseta heimsins norðastu oljuútbygging

Avgerðin kemur eftir, at Equinor og partarnar hava mett um útbyggingarkostnaðin, sum er hækkaður nógv seinastu tíðina eins og órógv og óvissu á veitingarøkinum.

Ætlanin var annars, at avgerðin um hesa størstu útbyggingina í Barentshavinum skuldi vera í desember í ár. Nú er avgjørt, at avgerðin um útbyggingina verður í 2026 ístaðin.

Nógv kjak hevur verið um hesa útbygging og hava umhvørvisfelagsskapir roynt at steðga henni. Equinor hevur tó alla tíðina sagt, at tað fer at útbyggja leiðina, tí hon hevur týdning bæði fyri felagið og fyri norska búskapin sum heild. Hon vil eisini fáa týdning í tí støðu, sum heimurin og her sersakliga Evropa er í, tá tosað verður um orkutrygd.

Óvissurnar í løtuni eru rætt og slætt ov stórar til at fara undir eina so stóra útbygging sigur Equinor. So skjótt sum meira vissa er fyri veitingarídnaðinum fer Equinor undir aftur arbeiðið at leggja til rættis útbyggingina.

Umboð fyri Equinor vísir á, at felagið hevur 40 ára royndir í Barentshavinum og arbeiðir nú við at fáa gongd á framleiðsluna á eini aðrari stórari leið í grannalagnum, nevniliga Castberg leiðina, sum skal byrja framleiðsluna í 2024.

Equinor fer at brúka komandi árini til at menna Wisting verkætlanina við eitt nú at gera hana út við elektrifisering úr landi. Hetta verður eisini ein stór avbjóðing, tí leggjast skal ein 350 kilometrar long leiðing út landi til leiðina.