Vindmyllur í Danmark framleiða orku sum ongantíð fyrr

Hetta vísir ein uppgerð frá Wind Denmark, sum er áhugafelagið hjá donsku vindorkuvinnuni, sambært netmiðlinum Energy Watch mánamorgun.

Sambært Wind Denmark var samlaða framleiðslan frá vindmyllum í Danmark seinasta ár uppá 16,27 terawatt-tímar. Hetta er ein hækking uppá eitt prosent í mun til árið fyri eins og størsta framleiðslan nakrantíð. Methøga framleiðslan hevði við sær, at tær donsku vindmyllurnar framleiddu orku til tað, sum svarar til 46,1% av samlaðu streymnýtsluni í Danmark. 

“Tað eru góð tíðindi fyri grøna skiftið, at vit eru komin hartil, at vindorkan røkkur nýggjum hæddum í ársframleiðsluni,” sigur Jan Hylleberg, fyrisitingarstjóri í Wind Denmark. 

Samlaða framleiðslan er danmarkarmet, og luturin, sum vindorkan stendur fyri uppá góð 46% er nakað, sum einki annað land í heiminum er ført fyri at vísa á í síni elskipan.