Vindorkan vindur upp á seg

M.a. hetta vísir umfevnandi og áhugaverda frágreiðingin, sum Umhvørvisstovan hevur gjørt og latið kunngera.

Orsøkin til minkingina í oljunýtsluni í 2022 er, verður víst á í frágreiðingini, at SEV brúkti á leið 10.500 tons minni av tungolju í 2022 enn í 2021. Hetta eisini hóast at elframleiðslan vaks 2 %. Minkingin kemst av, at munandi meira av varandi orku varð framleidd í 2022 enn í 2021.

Serliga vaks parturin úr vindi, vøksturin var heili 67 %, sum svarar til á leið 36.000 kWh. Eisini var framleiðslan úr vatni størri enn í 2021. Hetta svarar til góðir 30 túsund kWh. Í 2022 stavaðu 52 % av orkuni, sum varð brúkt til at framleiða el, frá varandi orkukeldum. Hetta er 12 % hægri enn í 2021.

Jaliga gongdin í 2022 við at skifta frá olju til varandi orku til at framleiða el, sæst týðiliga á myndini niðanfyri. Orka úr vatni og vindi eru, við á leið eini helvt hvør, komin í staðin fyri olju. Nýggja vindorkan stavar serliga frá nýggju vindmyllunum í Porkeri og á Gellingarkletti.

Orsøkin til stóra fallið í útlátinum frá elframleiðslu í 2015 – sum sæst á - var, at tá vórðu vindmyllurnar í Neshaga og Húsahaga tiknar í nýtslu, og at nógv avfall gjørdi 2015 til eitt gott vatnorkuár.

Sigurð í Jákupsstovu, stjóri á Umhvørvisstovuni fegnast um jaligu gongdina í føroysku orkuskipanini. Við Útvarpið segði hann í vikuni, at tað er ikki minst at fegnast um, at vindorkan hevur vundið so nógv uppá seg, soleiðis at hon saman við vatnorkuni hevur minkað um oljunýtsluna.

Umhvørvisstovan, sum hevur gjørt seinastu frágreiðingina um orku og útlát, kunnar seg javnan við gongdina í útlandinum eins og hon kunnar har um gongdina í Føroyum. Her hevur stjórin Sigurð í Jákupsstovu framløgu um m.a. vindorkumenningina í Føroyum á ráðstevnu í Hetlandi, sum Nordisk Energiforskning skipaði fyri. Mynd Jan Müller

Hann vísir serliga á stóran týdningin, sum vindmylnulundirnar á Gellingarkletti og í Porkeri hava havt fyri at minka um oljunýtsluna í sambandi við at framleiða grønan streym. -Her er hent nógv gott seinasta árið í mun til grøna elframleiðslu, har tú framleiðir streym nógv grønari úr varandi orkuu heldur enn úr olju sigur Sigurð í Jákupsstovu.

Føroyar hava sett grøna orkuskiftið á skránna, og við tí fara vit helst at síggja fleiri vindmylnulundir á landi komandi árini, og tað merkir, at uttan mun til um okkum hóvar tað ella ikki, mugu vit liva við at síggja hesar úti í náttúruumhvørvinum. Hóast tað er ynskiligt, so verður tað helst seinur dagur, at vit fara at síggja flótandi havvindmylnulundir, tó at hesar eru framtíðin í flestu av grannalondunum.

Myndir Jan Müller