Føroyskt íkast til at minka um veðurlagsbroytingar

Ein nýggj vísindalig grein um føroysku undirgrundina er júst útkomin í altjóða tíðarritinum Basin Research. Greinin snýr seg um, hvussu vit kunnu gagnýta tær dátur og vitan, ið vit hava frá kanningum gjørdar í sambandi m.a. við oljuleiting og tunnilsgerð, til at kanna møguleikarnar fyri CO2-goymslu her í Føroyum.

Rakul M. I. Johannesen, jarðfrøðingur á Jarðfeingi, hevur skrivað greinina saman við Janu Ólavsdóttir og Óluvu Eidesgaard á Jarðfeingi, Olivier Galland frá Universitetinum í Oslo, Lars Ole Boldreel frá Universitetinum í Keypmannahavn og Kim Senger frá Universitetssentrinum á Svalbard.

Partur av verkætlanini er at bora eitt 500 metrar djúpt hol. Tað varð gjørt í vikuni. 

Fyri at røkka málunum um at minka um veðurlagsbroytingarnar er neyðugt at gagnýta tøknina, har CO2 verður goymt í undirgrundini (Carbon Capture and Storage), hetta slær IPCC fast. Ein máti at gera hetta er at goyma CO2 í undirgrund, ið er bygd upp av basalti. Fyri at gera hetta er alneyðugt at kenna undirgrundina til fulnar, og her hava vit í Føroyum ein fyrimun við øllum tí arbeiði, sum longu er gjørt.

Greinin vísir á, hvussu vit við at samla ymiskar dáturnar saman í ein 3D-dátugrunn (m.a. boringar, hæddarmodell, dýpdardátur og seismikk) kunnu fáa enn meiri vitan burturúr. Við hesum dátugrunninum kunnu vit t.d. kortleggja fláirnar tvørtur um firðir, sum áður hevur víst seg at vera avbjóðandi.

Greinin slær millum annað fast, at tað ikki er umskarðing í Skopunarfirði, sum annars áður hevur verið hildið, og at fláirnar hella orsakað av upplyfti vestanfyri Føroyar. Hesar báðar niðurstøðurnar hava stóran týdning, tá ið vit skulu eftirmeta, hvussu CO2 flytir seg í føroysku undirgrundini.

> Les greinina her <

Kelda: jf.fo

Sí eisini greinar  um sama mál á orkan.fo

https://orkan.fo/jardfeingi-borar-nu-co2-hol

https://orkan.fo/royndarverkaetlan-vid-co2-goymslu-i-foroyum