Frank Strang slóðarin aftan fyri rúmdarstøð í Hetlandi farin

Júst sum seinasta stig varð tikið til at gera verkætlanina við rúmdarútskjótingarstøðini Saxavord Spaceport á Unst í Hetlandi til veruleika við fyrstu útskjótingini av raket við fylgisveini, rakti hervilig sjúka odda- og undangongumannin aftanfyri verktætlanina, Frank Strang. Hann doyði í vikuni.

Hann slapp tí ikki at síggja úrslitið av sínum skjótt 10 ára fyrireikingararbeiði at gera Hetland til fyrsta staðið í Evropa til útskjóting av smærri rakettum við fylgisveinum. Fyrsta útskjótingin varð á skránni til í heyst.

Føroyska ferðalagið, sum vitjaði rúmdarstøðina í mars í ár. Frank Strang uttast til høgru greiðir heilhjartaður frá hesi spennandi og "uniku" verkætlan (Mynd: Jan Müller)

Tað eydnaðist tó einum føroyskum ferðalag at hitta henda sjáldsama og ævintýrkenda íverksetan í mars, tá 12 vinnulívsfólk úr Føroyum vitjaðu í Unst, har Saxavord Spaceport liggur.

Ein eldhugaður og engageraður Frank Strang roynir at sannføra føroyska landsstýrismannin um týdningin, sum Saxavord Spaceport eisini kann hava fyri Føroyar og føroyska rúmdarvinnu (Mynd: Jan Müller)

Johan Mortensen frá ráðgevarafyritøkuni Baldur hevur nú í eina tíð havt tætt samband við Frank Strang, og var teirra vinskapur eisini íblástur til føroyingar at fara til Hetlands at síggja við egnum eygum, hvat hendir á Unst so tætt við Føroyar.

Johan Mortensen frá ráðgevarafyritøkuni Baldur saman við oddamonnunum í Articon á vitjan á Saxavord Spaceport í Hetlandi  

Ætlanin við vitjanini varð eisini at kunna seg um møguleikarnar at tengja Føroyar uppí verkætlanina við at vera móttøkustøð fyri data frá fylgisveinum, sum væntandi verða uppsendir í framtíðini og allir hava kós yvir Føroyar.

Áhugin hjá Johan Mortensen fyri hesi sjáldsomu verkætlan varð eisini orsøk til eitt sera tætt vinarlag millum teir báðar. 

Frank Strang var altíð blíður og fyrikomandi og royndi at vísa umverðini týdningin við hesi fyrstu evropeisku rúmdarstøðini. 

Seinasta nýggja um virksemið á rúmdarstøðini í Hetlandi er, at ein bretsk fyritøka herfyri fekk loyvi frá bretskum fyritøkum sum tann fyrsta yvirhøvur at kunna brúka Saxavord Spaceport til at senda upp smærri fylgisveinar. 

Johan Mortensen, sum arbeiðir íðin fyri at fáa Føroyar við í rumdarvinnuna, her á rúmdarstøðini á Unst í Hetlandi 

Ætlanin var at føroyingar skuldu vera til stadar saman vid Frank í heyst, tá fyrsta útskjótingin verður frá Unst, helst í november. Henda ætlan er ikki slept, og er ætlanin, at eitt føroyskt ferðalið fer til Hetlands tá. 

Johan Mortensen sigur við orkan.fo, at missurin av Frank er tungur – ein slóðari og sum sýnir i verki, at um tú hevur ambitiónir og drive, hvat kanst tú tá ikki fáa av skafti.