Gazprom skrúvar fyri aftur gassi í tríggjar dagar

So hendi tað aftur. Nord Stream 1 gassleiðingin millum Russland og Týskland steðgar heilt veitingina av gassi til Evropa í tríggjar dagar seinast í august mánað. Gazprom sigur, at hetta er partur av vanliga viðlíkahaldinum av leiðingini eftir 1000 tíma rakstur.

Tá arbeiðið er liðugt verður veitingin tikin uppaftur, tó verður hon bert 20% av tí, sum gassleiðingini annars er før fyri at flyta. Hetta tí at russar góðkenna ikki sanktiónirnar, sum lond hava sett í verk móti Russlandi.

Tíðindini fingu beinanvegin gassprísin at hækka eins og óttin fyri gasstroti í Evropa í vetur veksur.