Mærsk gongur undan at byggja nýggj skip til grønt brennievni

Umframt hesa tilgondina við nýggjum skipum hevur Mærsk eisini gjørt av sum tað fyrsta konteynarareiðaríið í heiminum at umbyggja eitt av sínum verandi skipum til eisini at kunna sigla við metanoli. Talan er um Maersk Halifax, sum nú verður útgjørt til at kunna sigla bæði við diesel og metanol. Eftir hetta fara fleiri onnur skip í verandi flota at verða gjørd út til metanol eisini. 

Stóri spurningurin í løtuni er framleiðslan av metanoli til nýggju skipini. Enn er óvist, um framleiðslan fer at nøkta vaksandi tørvin. Mærsk hevur fyrr sagt, at tað hevur brúk fyri 700.000 tonsum av e-metanol í 2025. Mærsk hevur longu gjørt vart við, at fyritøkan fer neyvan at fáa nóg mikið av e-metanoli sum støðan er í løtuni. Higartil hevur felagið einans gjørt avtalu um veiting av 16.000 tonsum av grønum metanoli til Mærsk um árið frá 2024. 

Stjórin í Mærsk fyri grøna orkuskiftinum, Morten Bo Christiansen sigur, at hóast mangulin av metanoli, so hevur fyritøkan framvegis álit á, at hon fer at røkka sínum klimamálum fyri bæði 2030 og 2040.

Felagið lítir á, at framleiðslan av metanoli fer at vaksa og vísir her m.a. til arbeiðið  hjá sjóvinnufelagsskapinum IMO at skunda undir metanolframleiðslu.

Støðan í løtuni er tann, at tað framvegis er nógv bíligari at brúka diesel enn grøna brennievnið sigur Vincent Clerc, stjóri í Mærsk. Hann vísir á, at skal tað eydnast at fáa gongd á henda týðandi partin av grøna orkuskiftinum, so mugu eisini kundarnir hjá reiðaríunum vera partur av tilgongdini tvs. vera til at gjalda tað hetta kostar.

Hetta kann ikki bara vera ein uppgáva fyri Mærsk. Vísir tað seg, at onnur ikki vilja vera við til at rinda fyri grøna orkuskiftið, so fer hetta at koma sera illa við hjá komandi ættarliðum, sigur hann. 

Um tað ikki eydnast IMO at gera eina skipan um, hvussu málið um klimaneutralitet fyri altjóða sjóvinnu í 2050 verður rokkið, so verður torført hjá Mærsk at røkka sínum egnu málum. Stjórin í Mærsk sigur, at talan er um eina so mikið stóra avbjóðing, at einki einsamalt felag megnar at loysa hana.  

Á COP28 ráðstevnuni skrivaðu fleiri av heimsins størstu reiðaríum teirra millum Mærsk, CMA-CGM, Hapag Lloyd, MSC og Wallenius Wilhelmsen undir eina felags yvirlýsing, har tey komu við eini áheitan um, hvussu útlátið av vakstrarhúsgassum frá skipavinnuni kann minkast. M.a. skal setast endadagur fyri seinastu skipunum, sum kunnu brúka fossil brenievni og síðani eisini gerast ein javnvágsskipan, ið kann útjavna prísmunin millum fossil og grøn brennievni. 

Kelda: Søfart