Uttanlands

Mærsk ger stóravtalu um metanol til síni grønu skip

Danska reiðaríið gongur á odda við at brúka grønt brennievni heldur enn fossil.

2023-11-22 11:12

Jan Müller

Danska reiðaríið Mærsk, sum telist millum tey reiðarí í heiminum, ið ganga á odda í grøna orkuskiftinum, hevur gjørt sáttmála um veiting av grønum metanoli til komandi flotan av konteynaraskipum, sum skulu brúka nýggj grøn brennievni. Hetta skrivar Shipping Watch í morgun. Talan er um kinverska vindorkuframleiðaran Goldwind.

Goldwind skal veita eina hálva millión tons av grønum metanoli til Mærsk um árið frá 2026 sæst í einni fráboðan frá felagnum.

-Hetta er eitt týðandi vegamót fyri Mærsk, tí sáttmálin ger okkum før fyri at minka munandi um útlátið longu innan 2030 og hjálpir okkum at røkka 1,5 stig málinum, sum verður umrøtt í París-avtaluni sigur Rabab Raafat Boulos, stjórin fyri undirstøðukervið hjá Mærsk.

Mærsk hevur longu tikið ímóti tí fyrsta metanol skipinum, Laura Mærsk, sum skal sigla í Evropa. Fyrsta skipið, sum skal sigla millum heimspartar og brúka metanol, er longu ávegis. Tað verður latið av skipasmiðjuni í 2024, og tað seinasta av 25 líknandi skipum verður latið í 2027.

Mærsk hevur boðað frá, at samtakið tørvar fimm milliónir tons av grønum metanoli í 2030. Reiðaríið er tí í ferð við at gera samstørv við framleiðarar av metanoli kring heimin. Higartil eru gjørdar avtalur við 10 fyritøkur, ið kunnu veita metanol til vaksandi grøna flotan hjá Mærsk skrivar Shipping Watch, ið eisini veit, at Mærsk og onnur reiðarí hava bílagt 200 skip, sum kunnu brúka grønt metanol ístaðin fyri fossil CO2 útláts brennievni.

A.P. Møller Holding og Mærsk hava longu stovnað eitt nýtt felag, C2X, sum skal menna og reka metnol-støðir, sum skulu veita metanol til shippingídnaðin. Fyrstu av hesum slag verða bygd í Egyptalandi og Spania.

Føroyar og grøn brennievni á Hafnia

Í løtuni sita umboð fyri føroysk reiðarí, vinnuna annars og myndugleikar á tiltaki í Havn fyri nettupp at viðgera, hvussu føroyingar kunnu gera sær dælt av menningini av m.a. grønum metanoli í okkara grannalondum. Tað er MEST, sum skipar fyri hesum háaktuella og týðandi tiltakinum við serfrøðingum úr Danmark, Norra og Finlandi.

Millum føroysku luttakararnar eru eisini umboð fyri føroyskar vindorkuframleiðarar, eitt nú EFFO, sum hava stórar framtíðar ætlanir um framleiðslu av vetni, ið aftur skapar grundarlag fyri framleiðslu av eitt nú metanoli.

Vinarliga broyt tínar kennifíla - og privatlívsstillingar fyri at síggja hetta innihald