Umstøður í føroysku undirgrundini meinlíkar Rosebankkeldu bretskumegin markið

Greinin, sum tríggir granskarar á Jarðfeingi hava skrivað í viðurkenda tíðarritinum Petroleum Geoscience, kemur til ta áhugaverdu niðurstøðu, at møguleiki er fyri fleiri ymiskum sløgum av kolvetnisfellum í føroysku undirgrundini m.a. fellum, ið eru meinlíkar Rosebank-fundinum bretskumegin markið.

Rosebank fundið ella keldan, sum liggur skamt frá føroyska markinum, goymir hundraðtals mió. tunnur av olju og gassi. Norska Equinor, sum er fyristøðufelag á hesi stóru kelduni, fer eftir ætlan at taka støðu til útbygging í summar. Høgu olju- og gassprísirnir, tørvurin á fyrst og fremst gassi og áheitan frá bretsku stjórnini til feløg at skunda undir framleiðslu og leiting eftir kolvetnum á bretska landgrunninum, fara uttan iva at vera við í endaligu avgerðini hjá Equinor til útbygging av Rosebank. 

Nú varpar so grein ljós á føroyska undirgrund, sum kann vera meinlík henni á Rosebankleiðini.  

Í tríðindaskrivi á heimasíðuni hjá Jarðfeingi stendur at lesa um greinina:

Vísindalig grein um nýggjar møguleikar í sambandi við kolvetnisleiting

"Fyrstu boringarnar á føroyska landgrunninum vóru allar í ella nærhendis Judd-lægdini. Hesar boringar vístu, at jarðfrøðin upp á nógvar mátar var ein onnur enn væntað, har størsta avbjóðingin viðvíjandi kolvetnisleiting var, at har var nærum bara sandur og harvið onki “segl”, sum kundi fanga kolvetnið (leirgrýti er mest vanliga segl í kolvetnisfellum). Hetta gjørdi, at oljufeløg byrjaðu at hyggja at øðrum pørtum av føroyska landgrunninum.

Nú hava Heri Ziska, Uni Árting og Morten Riishus givið út grein í viðurkenda tíðarritinum Petroleum Geoscience, har teir hava hugt nærri at økinum í og kring Judd lægdina. Hendan greinin vísir á fyrsta sinni, hvussu gosgrýti og annað grýti rennur saman mitt í Hetlandsrennuni. Hetta er viðkomandi í sambandi við kolvetnisleiting, tí gosgrýti er sum oftast líka tætt sum leirgrýti og kann tískil vera tað seglið, sum annars manglar í økinum, har fyrstu boringarnar vórðu gjørdar.

Í greinini verður víst á, hvussu hesi trý tíðarskeiðini, har gosgrýti er komið inn í økið, hvør sær hava givið møguleika fyri fleiri ymiskum sløgum av kolvetnisfellum, m.a. fellum, ið eru meinlíkar Rosebankfundinum bretskumegin markið."

Tak greinina niður her.