Oljuprísurin tann hægsti í tríggjar vikur

Oljuprísurin er hækkaður støðugt seinastu tíðina til 85 dollarar fyri tunnuna. Tað er hægsti prísur í tríggjar vikur. Bara í farnu viku hækkaði prísurin við 7%.

Orsøkirnar til hækkingina er støðan í Kina og USA. Í Kina hevur stjórnin linkað restriktiónirnar kring korona, sum fer at økja um oljunýtsluna aftur.

Frá 8. januar verða eisini karantenureglarnar fyri útlendingar, sum koma til Kina, settar úr gildi.

Í USA ávirkar ein óvanliga kaldur vetur eisini oljuprísin, nú fleiri av oljuraffinaríunum í Texas eru stongd. Tó verður roknað við minni kava komandi tíðina og fer tað at lata upp aftur fyri oljuframleiðsluni og harvið eisini ávirka oljuprísin aftur.

Óttin fyri at Russland fer at skerja oljuframleiðsluna við 5% til 7% tíðliga í nýggja árinum hevur eisini ávirkað oljuprísin. Hetta skriva bæði Bloomberg og Reuters í morgun.

Meðalprísurin á olju í 2022 hevur ligið um 100 dollarar fyri tunnuna. Hann var lægstur í byrjanini av árinum við 78 dollarum og hægstur í mars við 130 dollarum fyri tunnuna.

Oljugreinarar vilja vera við, at vit fáa ein oljuprís uppá 100 dollarar í 2023, hetta fyrst og fremst orsakað av, at búskapurin í Kina av álvara fer í gongd aftur m.a. vegna fækkandi koronarestriktiónir. Eisini tíðindini um nýggjar sanktiónir móti Russlandi í nýggja árinum kunnu ávirka oljuprísin. 

Bank of America segði nú um dagarnar, at oljuprísurin fer helst at hækka til 90 dollarar í næstum.